जनकपुरधाम । धनुषाको हंसपुर नगरपालिकालाई लोकतान्त्रिक समाजवादी पार्टी(लोसपा) नगर कमिटीले २२ बुंदे ध्यानाकर्षण पत्र बुझाएको छ ।
नगर कमिटी अध्यक्ष लालबाबु यादव नेतृत्वमा गएको नेता कार्यकर्ताले सोमबार उक्त ध्यानाकर्षण पत्र नगरपालिकामा बुझाएका हुन् ।
चालु आर्थिक वर्षमा संचालन भएको योजना र कार्यक्रमहरुमा आर्थिक अनियमितताको आरोप लोसपाका नेताहरुले लगाएका हुन् । नगर प्रमुख प्रदिप यादवले ज्येष्ठ नागरिक सम्मान कार्यक्रम, छठ पर्वमा गरिव, विपन्नलाई पूजा सामग्री वितरणमा आर्थिक अनियमितता गरेको आरोप उनीहरुले लगाएका हुन् । कृषि सामग्री खरिद गर्न छुट्टयाएको बजेटबाट खरिद गरिएको टयांकी आप्mनो नातेदारलाई वितरण गरेको आरोप उनीहरुको छ । कृषि प्याकेट खेतीको लागि छुट्टयाएको बजेटमा अनियमितता भएको आरोप उनीहरुले लगाएका हुन् ।
चालु वार्षिकमा नगर प्रमुख यादवले कृषि विद्युत जडान गर्नको लागि छुट्टयाएको बजेटले आप्mनो हितैसीको घरमा विद्युत जडान गर्न लगाएको आरोप नगर अध्यक्ष लालबाबु यादवले बुझाएको ध्यानाकर्षण पत्रमा उल्लेख छ ।
ध्यानाकर्षणपत्रको बोधार्थ मुख्यमन्त्री तथा मन्त्रिपरिषद्को कार्यालय, अख्तियार दुरुपयोग अनुसन्धान आयोग र जिल्ला प्रशासन कार्यालय धनुषालाई समेत बुझाएको छ । यादवले गएको आर्थिक वर्षमा संचालन गरिएको योजनाहरुको विस्तृत विवरणसहितको सूचना समेत माग गरेका छन् ।
