जनकपुरधाम । नेकपा एमालेले मधेश प्रदेशमा समर्थन कायमै राख्ने भएको छ ।
सोमबार एमालेले केन्द्र सरकारबाट बाहिरिने निर्णय गरेपनि मधेश प्रदेशमा भने अहिले समर्थन कायमै रहने एमाले संसदीय दलका नेता एवं भौतिक पूर्वाधार विकासमन्त्री सरोजकुमार यादवले जानकारी दिए ।
उनले तत्काल मधेश सरकारलाई समर्थन कायम रहने र एमाले सरकारमै रहने बताए । उनले पार्टीको निर्णयपछि मात्र केहि निर्णयमा पुग्ने बताए ।
मधेश प्रदेशमा जनता समाजवादी पार्टी(जसपा) नेपाल नेतृत्वको सरकारलाई नेकपा एमालेको समर्थन छ । नेकपा एमालेले भौतिक पूर्वाधार विकास, महिला, बालबालिका, युवा तथा खेलकूद मन्त्रालय, गृह तथा संचार र कानुन, न्याय तथा प्रदेशसभा मामिला मन्त्रालय र गृह तथा संचार राज्य मन्त्री पाएको छ । सोमबार बसेको नेकपा एमाले सचिवालय बैठकले केन्द्र सरकारबाट मात्र बाहिरिने निर्णय गरेको हो ।
एमालेका उपमहासचिव विष्णु रिजालले केन्द्र सरकारलाई दिएको समर्थन फिर्ता लिए पनि प्रदेशको हकमा त्यस्तो कुनै निर्णय नभएको जानकारी दिए ।
त्यस्तै, नेकपा एमाले मधेश प्रदेशका संसदीय दलका नेतासमेत रहेका भौतिक पूर्वाधार विकासमन्त्री यादवले पनि प्रदेश सरकारबाट नेकपा एमाले अहिले नबाहिरिने निर्णय गरेको जानकारी दिए । उनले भने, ‘प्रदेशमा भने अहिले तत्काल हाम्रो समर्थन कायमै रहने छ । केन्द्रको निर्देशनानुसार हामी अगाडि बढ्ने छौँ ।’
१०७ जना प्रदेशसभा सदस्य रहेको मधेश प्रदेशमा नेकपा एमालेका २५ जना सांसद छन् । मधेश सरकारमा हाल एमालेका चारजना मन्त्री, एक राज्यमन्त्री र सभामुख छन् । यहाँ सरकार निर्माणमा बहुमतका लागि ५४ जना सांसदको आवश्यकता रहे पनि जनता समाजवादी पार्टीका संसदीय दलका नेता सरोजकुमार यादव ६३ सांसदको समर्थनमा मुख्यमन्त्रीमा नियुक्त भएका थिए भने उनले सिंगो सदनको विश्वासको मतसमेत पाएका थिए ।
प्रदेशसभामा प्रतिनिधित्व गर्ने १० वटै दलले उनलाई विश्वासको मत दिएको थियो । पुस २७ गते प्रदेशसभाका १० दलमध्ये ७ दल र २ स्वतन्त्र गरी ६३ सांसदको समर्थनमा मुख्यमन्त्री नियुक्त हुँदा यादवलाई नेपाली कांग्रेस, लोसपा र नेकपा एकीकृत समाजवादी पार्टीले समर्थन गरेको थिएन ।
