मलंंगवा । स्कुल बसले मोटरसाइकललाई ठक्कर दिँदा मलंगवामा एक जनाको मृत्यु भएको छ भने दुई जना घाइते भएका छन् । दुर्घटनामा परी घाइते भएका दुई युवतीको अवस्था गम्भीर रहेको जिल्ला प्रहरी कार्यालय सर्लाहीले जनाएको छ ।
स्कुल बसको ठक्करबाट सर्लाहीको कबिलासी नगरपालिका–९ बस्ने १८ वर्षीय दीपेन्द्र महतोको मृत्यु भएको हो । दुर्घटनालगत्तै उनलाई उपचारको लागि प्रादेशिक अस्पताल मलंगवामा पु¥याइए पनि चिकित्सकले मृत घोषित गरेको सर्लाहीका प्रहरी प्रवक्ता प्रहरी नायब उपरीक्षक विजय श्रेष्ठले जानकारी दिए ।
सोही मोटरसाइकलको पछाडि सवार कबिलासी–१० की १७ वर्षीया सबनम गुप्ता र १७ वर्षीया पूजाकुमारी महतोको अवस्था गम्भीर रहेको छ । दुवै जनाको प्रादेशिक अस्पताल मलंगवामा सामान्य उपचारपश्चात थप उपचारको लागि वीरगञ्ज पठाइएको जिल्ला प्रहरी कार्यालय सर्लाहीले जनाएको छ ।
शनिबार बिहान करिब पौने १० बजे मलंगवा नगरपालिका–४ स्थित नवलपुर–मलंगवा सडकखण्डमा मलंगवाबाट गमहरियातर्फ जाँदै गरेको ना १ क ४९५१ नम्बरको जेसिस अंग्रेजी आवसीय माध्यामिक विद्यालयको स्कुल बसले भारतीय नम्बर प्लेटको मोटरसाइकललाई ठक्कर दिएको थियो । ठक्कर दिने स्कुल बस र बसका चालक प्रहरीको नियन्त्रणमा रहेका छन् ।
