जनकपुरधाम । मधेश प्रदेशका मन्त्रीहरुले आउँदो साता मात्रै जिम्मेवारी पाउने भएका छन् । गएको पुस २९ गते पद तथा गोपनीयताका शपथ ग्रहण गरेका मधेश प्रदेशका तीन जना मन्त्रीको जिम्मेवारी आउँदो साता तोकिने भएको छ ।
नेकपा एमाले संसदीय दलका नेता सरोज कुमार यादव, जनमत पार्टीका बसन्त कुशवाहा र जनता समाजवादी पार्टी(जसपा)का संजय कुमार यादवले पद तथा गोपनीयताको शपथ ग्रहण गरिसकेका छन् । गएको पुस २९ गते जसपा संसदीय दलका नेता सरोज कुमार यादवले मुख्यमन्त्रीको शपथ लिएपछि मन्त्रीहरुलाई प्रदेश प्रमुख हरिशंकर मिश्रले शपथ खुवाएका थिए । सत्ता साझेदार दलहरु बीच मन्त्रालय वाँडफाँटमा अभैm सहमति हुन नसकेकोले उनीहरुको जिम्मेवारी तोक्न ढिलाई भएको हो । आउँदो केही दिन भित्र मन्त्रीहरुको जिम्मेवारी तोकेर मन्त्रिमण्डल समेत विस्तार गर्ने तयारी रहेको मुख्यमन्त्री सचिवालयले जनाएको छ ।
मन्त्रीको जिम्मेवारी र मन्त्रिमण्डल विस्तारबारे मुख्यमन्त्री यादवले सत्ता साझेदार दलका नेताहरुसित छलफल गरेका छन् । मधेश प्रदेश सरकार विस्तार चाँडै गरिने तयारी अन्तिम चरणमा रहेको नेकपा माओवादी केन्द्र संसदीय दलका नेता समेत रहेका पूर्व गृह तथा संचार मन्त्री भरत प्रसाद साहले बताए । साहका अनुसार आउँदो सातासम्म मन्त्रीको जिम्मेवारी र सरकार विस्तार कार्य पूरा हुने छ । सरकारमा सहभागी दलका नेताहरु केन्द्रीय निर्णय कुर्नु परेकोले केही समय लागेको उनले स्वीकार गरे । मधेश प्रदेशमा जसपा नेतृत्वको सरकारमा नेकपा एमाले, जनमत पार्टी, नेकपा माओवादी, राष्ट्रिय प्रजातन्त्र पार्टी, संघीय समाजवादी पार्टी र लोकतान्त्रिक समाजवादी पार्टी(लोसपा) ले समर्थन गरेको छ । नेपाली कांग्रेस र नेकपा एकीकृत समाजवादी पार्टीले विश्वासको मत दिए पनि सरकारलाई भने समर्थन गरिसकेको छैन् । दुवै दल पर्ख र हेरको नीति लिएर अघि बढेको छ ।
मधेश प्रदेशमा मुख्यमन्त्रीसहित ११ सदस्यीय मन्त्रीमण्डल रहेको छ । नवनियुक्त मुख्यमन्त्री यादवले हालसम्म तीन जना मन्त्री नियुक्त गरेपनि उनीहरुको जिम्मेवारी भने तोकिसकेका छैनन् । अन्य दललाई समेत समेटेर सरकार विस्तार गर्ने कार्य पनि बाँकी नै रहेको छ ।
जसपाका संजय यादवलाई अर्थ, नेकपा एमालेका सरोज यादवलाई भौतिक पूर्वाधार र जनमत पार्टीका बसन्त कुशवाहालाई भुमि व्यवस्था, कृषि तथा सहकारी मन्त्रालयको जिम्मेबारी दिने श्रोतको दावी छ ।
