जनकपुरधाम । मधेश प्रदेशसभाका नवनिर्वाचित सभामुख रामचन्द्र मण्डल र उपसभामुख बबिताकुमारी राउत इशरले बुधबार पद तथा गोपनीयताको शपथ लिएका छन् । मधेश भवनमा बुधबार बिहान आयोजित एक कार्यक्रमका बीच सभामुख मण्डल र उपसभामुख इशरलाई प्रदेश प्रमुख हरिशङ्कर मिश्रले पद तथा गोपनीयताको शपथ ग्रहण गराए ।
सभामुख र उपसभामुखको शपथ कार्यक्रममा मधेश प्रदेशका मुख्यमन्त्री सरोजकुमार यादव, विना विभागीयमन्त्री सरोजकुमार यादव लगायतको उपस्थिति थियो । मण्डल र इशर मङ्गलबार नै मधेश प्रदेशको सभामुख र उपसभामुखमा निर्वाचित भएका थिए । मङ्गलबार बसेको प्रदेशसभा बैठकमा मण्डललाई सभामुखमा चयन गरियोस् भन्ने प्रस्तावको पक्षमा ७४ मत अर्थात् बहुमत सदस्यको समर्थन प्राप्त भएको थियो । कूल एक सय सात सदस्यीय प्रदेशसभामा एक सय तीन सदस्यले मतविभाजन प्रक्रियामा सहभागिता जनाएको थियो ।
मण्डललाई नेकपा (एमाले), जनता समाजवादी पार्टी (जसपा), जनमत पार्टी, नेकपा (माओवादी केन्द्र), लोकतान्त्रिक समाजवादी पार्टी (लोसपा), राष्ट्रिय प्रजातन्त्र पार्टी (राप्रपा), नेपाल सङ्घीय समाजवादी पार्टी र नागरिक उन्मुक्ति पार्टी गरी आठ दलले समर्थन गरेका थिए ।
धनुषा निर्वाचन क्षेत्र नं १(२) बाट प्रदेशसभा सदस्यमा निर्वाचित मण्डल यसअघि २०७४ को निर्वाचनमा नेकपा माओवादीबाट प्रदेशसभामा निर्वाचित भएका थिए । नेकपा छुटिदा उनी नेकपा एमालेतिर लागेर प्रदेशसभा पद समेत गुमाएका थिए । नेकपा माओवादीमा हुँदा उनले प्रदेशसभाको विकास समिति सभापतिको जिम्मेवारी समेत निर्वाह गरेका थिए ।
सभामुखका लागि नेपाली कांग्रेसका जङ्गीलाल राय यादव पनि प्रतिस्पर्धामा थिए । उनलाई नेकपा (एकीकृत समाजवादी) ले समर्थन गरेको थियो ।
यसैगरी जनमत पार्टीका उम्मेदवार इशरलाई उपसभामुखमा निर्वाचित गरियोस् भन्ने पक्षम ७२ मत प्राप्त भएको थियो । उनको विपक्षमा २९ मत खसेको थियो । उपसभामुखको निर्वाचन प्रक्रियामा एक सय एक सदस्यले सहभागिता जनाएको थियो । सप्तरीकी इशर जनमत पार्टीबाट समानुपातिकतर्पm निर्वाचित भएकी छन् ।
