जनकपुरधाम । मधेश प्रदेशमा माघ २ गतेको लागि तोकिएको सभामुखको निर्वाचन एक दिनको लागि स्थगित गरिएको छ । सभामुखको निर्वाचन माघ ३ गते मंगलबार हुने भएको छ । पोखरा विमान दुर्घटनामा ज्यान गुमाएको शोकमा सोमबार प्रदेशसभाको बैठक एक दिनको लागि स्थगित गरिएको प्रदेशसभा सचिवालयका सचिव रंजित कुमार यादवले बताए ।
आइतबार बिहान पोखरामा यति एयरलाइन्सको विमान दुर्घटनामा परी ज्यान गुमाएको शोकमा संघीय सरकारले सोमबार सार्वजनिक विदाको घोषणा गरेको छ । प्रदेशसभाको सोमबारको बैठकमा सभामुख र उपसभामुखको चुनावका साथै नवनियुक्त मुख्यमन्त्री सरोज कुमार यादवले विश्वासको मत लिने तालिका थियो । तर, आइतबार बिहान विमान दुर्घटनाले सिंगो देशलाई मर्माहत तुल्याएपछि मधेश प्रदेशसभाको बैठक एक दिन अघि सारेको हो ।
प्रदेशसभाको अर्को बैठक मंगलबार दिउँसो १ बजे बस्ने भएको छ । मंगलबार बस्ने बैठकले प्रदेशको सभामुख र उपसभामुखको टुंगो लगाउने छ भने मुख्यमन्त्री यादवले विश्वासको मत समेत लिने छन् । सभामुखको लागि सत्ता गठबन्धनको तर्पmबाट नेकपा एमालेका रामचन्द्र मण्डल र नेपाली कांग्रेसबाट जंगीलाल रायले उम्मेदवारी दिएका छन् । सत्ता गठबन्धनसित झण्डै दुई तिहाई प्रदेशसभा सदस्यको समर्थन रहेकोले सभामुखमा मण्डल निर्वाचित हुने निश्चित छ ।
