जनकपुरधाम । मधेश प्रदेशमा सभामुख र उपसभामुखको निर्वाचन कार्यतालिका पुस २९ गते सार्वजनिक गरिने भएको छ । प्रदेशसभाको सोमबार बसेको प्रथम बैठकले सभामुख र उपसभामुखको चुनावको मिति माघ २ गते तोकिएको प्रदेश सभाका ज्येष्ठ सदस्य गोविन्द बहादुर न्यौपानेले बताए । प्रदेश सभा कार्य सञ्चालन नियमावली २०७५ को दफा ७ बमोजिम प्रदेश सभामुखको चुनावको तालिका पुस २९ गते सार्वजनिक गरिने प्रदेश सभा सचिवालयका सचिव रञ्जित कुमार यादवले बताए ।
चुनावका लागि मिति तोकिएको बैठकमा जानकारी दिइएको थियो । यसअघि प्रदेशसभाको बैठकले सभामुख र उपसभामुखको चुनाव माघ २ गते गर्ने निर्णय गरेको छ । संघमा रहेको सत्ताधारी दलका सामूहिक उम्मेदवार नै सभामुख र उपसभामुखमा निर्वाचित हुने करिब पक्का छ । प्रदेशसभामा नेकपा एमालेको २३, जसपाको १६, जनमत पार्टीको १३, नेकपा माओवादीको ९, राप्रपा र नागरिक उन्मुक्ती पार्टीको एक÷एक गरी ६३ जना सांसद रहेकोले सभामुख र उपसभामुख संघमा सत्ता सहयात्री रहेको दलहरुले पाउने निश्चित छ ।
न्यौपानेको अध्यक्षतामा बसेको प्रदेशसभाको पहिलो बैठकमा दलका नेताहरुले शुभकामना मन्तव्य राखेका थिए ।
नेपाली कांग्रेस र लोकतान्त्रिक समाजवादी पार्टी(लोसपा) का प्रदेश सांसदहरुले पहिलो बैठकप्रति नियमापति जनाएका थिए । शुभकामना मन्तव्य राख्न गएका नेपाली कांग्रेसका नवनिर्वाचित प्रदेशसभा सदस्य रामसरोज यादवले बैठकप्रति नियमापति जनाएका छन् । उनले प्रदेशसभाले शपथ गरेको दुई दिन नबित्दै अधिवेशन आह्वान गरेकोप्रति उनले आपति जनाएका थिए । गएको बिहीबार प्रदेशसभाका ज्येष्ठ सदस्यलाई शपथ ग्रहण गराउँदै प्रदेश प्रमुख हरिशंकर मिश्रले प्रथम अधिवेशन पुस १८ गतेको लागि आह्वान गरेका थिए ।
गएको शुक्रबार नवनिर्वाचित प्रदेशसभा सदस्यहरुले पद तथा गोपनियताको शपथ ग्रहण गरेका थिए ।
ऐन अनुसार संसद सचिवालयले पहिलो अधिवेशन बोलाउदा कम्तिमा सात दिन अगाडि जानकारी दिनुपर्ने हो, लोसपाका प्रदेशसभा सदस्य उपेन्द्र महतोले भने– तीन दिनमै अधिवेशन आह्वान गरिएको छ । सभामुखले मुख्यमन्त्रीको आग्रहमा प्रदेश प्रमुखले अधिवेशन आहवान गरेको जवाफ फर्काएका थिए । मुख्यमन्त्री राउतले पनि गल्ती भएको स्वीकार गरेका थिए ।
