जनकपुरधाम । नेपाली कांग्रेसकी चन्दा चौधरी र नेकपा एमालेकी अमृत अग्रहरी भाग्यमानी नेतृ भएकी छन् । दुवै नेतृ गएको असोजमा मात्रै पार्टी छाडेर अन्य पार्टी रोजेकी थिइन् । नेतृद्वय चौधरी र अग्रहरीलाई नयाँ पार्टीले पुनः प्रतिनिधिसभामा पुर्याएको छ । जनता समाजवादी पार्टी पार्टी(जसपा) हुँदै लोकतान्त्रिक समाजवादी पार्टी(लोसपा) बाट महिला, बालबालिका तथा ज्येष्ठ नागरिक मन्त्री समेत भएकी नेतृ चौधरी गएको असोज १२ गते पार्टी छाडेर एकाएक नेपाली कांग्रेस प्रवेश गरेकी थिइन् । लोसपा छाड्ने सुइको समेत नदिई उनी कांग्रेस सभापति एवं प्रधानमन्त्री शेरबहादुर देउवाको हातबाट टीका लगाएर कांग्रेस प्रवेश गरेकी थिइन् । देउवाले नै उनलाई कांग्रेसको सदस्यता प्रदान गरेका थिए ।
उनी २०७४ सालको चुनावमा महन्थ ठाकुर नेतृत्वको तत्कालीन राष्ट्रिय जनता पार्टी (राजपा)बाट समानुपातिक सांसद बनेकी थिइन् । नेत्री चौधरी नेकपा (एमाले) का अध्यक्ष केपी शर्मा ओली नेतृत्वको सरकारमा महिला, बालबालिका तथा ज्येष्ठ नागरिक मन्त्री बनेकी थिइन् । तर, १८ दिनमै उनको पद गएको थियो ।
नेतृ चौधरी कांग्रेस ब्याकग्राउण्डकी थिइन् । उनका दाइ नरेश चौधरी कांग्रेस नेता थिए । २०५४ सालमा बेपत्ता उनको अवस्था अहिलेसम्म अज्ञात छ ।
उनी महोत्तरीबाट राजनीतिमा सक्रिय छिन् ।
आगामी प्रतिनिधि सभाको निर्वाचनमा टिकट पाउने आश्वासन पाएपछि कांग्रेस प्रवेश गरेको जनाइएको छ । प्रधानमन्त्री देउवाले दिएको आश्वासन अनुसार नेतृ चौधरी समानुपातिकतर्पmबाट दोश्रो कार्यकालको लागि सांसद हुने भएकी छन् । पार्टी छाडेर आएकी तीन महिना नबित्दै उनी दोश्रो कार्यकालको लागि समानुपातिकबाट प्रतिनिधिसभा सदस्य चुनिने पक्का भएको छ । पार्टीले मधेशी महिला कोटाबाट उनको नाम शनिबार निर्वाचन आयोगमा पठाइसकेको छ ।
यस्तै अमृता अग्रहरी पनि भाग्यमानी नेतृमा परेकी छन् । जनता समाजवादी पार्टीका केन्द्रीय कार्यकारिणी समिति सदस्य अमृत अग्रहरिले गएको असोज २ गते नेकपा एमाले प्रवेश गरेकी थिइन् । आमचुनावको लागि उम्मेदवारहरुको नाम छनौट भइरहदा उनी जसपा छाडेर एमाले प्रवेश गरेकी थिइन् । एमाले अध्यक्ष केपी शर्मा ओलीले उनलाई पार्टी प्रवेश गराएकी थिइन् । उनलाई पनि सांसद बनाउने आश्वासन दिएको थियो । ओलीले अग्रहरीलाई सांसद बनाउन लागेको हो ।
निवर्तमान प्रतिनिधिसभा सदस्य समेत रहेकी अग्रहरी कपिलवस्तु जिल्लाकी राष्ट्रिय जनता पार्टी राजपाबाट सांसद बनेकी थिइन् । उनी जनता समाजवादी पार्टी विभाजनपछि तटस्थ बसेकी थिइन् ।
