जनकपुरधाम । नेपाली कांग्रेसका नेता विमलेन्द्र निधिले सत्तागठबन्धन अहिलेको आवश्यकता भएको भन्दै गठबन्धनका उम्मेदवारहरुलाई विजयी गराउन आह्वान गरेका छन् ।
नेपाली कांग्रेस बाराले पार्टी कार्यालय कलैयामा बिहीबार आयोजना गरेको अगुवा कार्यकर्ता भेलालाई सम्बोधन गर्दै नेता निधिले गठबन्धनका उम्मेदवारहरुलाई भोट हालेर सत्तागठबन्धनलाई निरन्तरता दिनुपर्नेमा जोड दिए ।
४ मंसिरको चुनावपछि कांग्रेसको नेतृत्वमा सरकार गठन हुने र त्यही सरकारले नागरिकता विधेयक अघि बढाएर नागरिकता समस्याको सधैका लागि हल गर्ने उनले जिकिर गरे ।
उनले भने, ‘ चुनावपछि कांग्रेसको नेतृत्वमा सरकार गठन हुन्छ र यही सरकारले नागरिकता विधेयक अघि बढाएर नागरिकता समस्याको सधैका लागि हल गर्छ ।’
नेता निधिले चुनाबमा एमाले नेतृत्वको गठबन्धन बलियो भएमा नागरिकता समस्या कहिल्यै पनि हल नहुने उल्लेख गरे ।
कांग्रेस जिल्ला सभापति राजेश यादवको सभापतित्वमा भएको अगुवा कार्यकर्ता भेलामा पूर्वराज्यमन्त्री कलावती पासवान, पूर्वसांसद डा. शोभाकर पराजुलीलगायतले पार्टीभित्रका सानातिना विवादलाई भुलेर गठबन्धनका उम्मेदवारलाई विजयी गराउन आह्वान गरेका थिए ।
