काठमाण्डौ । जनता समाजवादी पार्टीले आगामी मंसिर ४ को निर्वाचनका लागि उम्मेदवार बन्न २ मापदण्ड र ७ योग्यता प्रस्ताव गरेको छ । जसपाको राजनीतिक समिति बैठकको प्रस्तावमा अध्यक्ष उपेन्द्र यादवले मापदण्ड र योग्यता प्रस्ताव गरेका थिए ।
उम्मेदवार बन्न मूल मापदण्ड पार्टी र समाजमा लोकप्रिय, सक्षमता, दक्षता, निष्पक्षता र निरन्तरता रहेको छ । अर्को मापदण्डमा प्रदेश सभा निर्वाचन क्षेत्र र प्रतिनिधि सभा निर्वाचन क्षेत्रको गहन अध्ययन र विश्लेषणबाट निर्क्योल गरिने बताइएको छ ।
यस्तै ,उम्मेदवार बन्न पाँचवटा योग्यता तय गरिएका छन् । जसमा पार्टीको विचार नीति, सिद्धान्त र कार्यक्रमलाई आत्मसाथ गर्ने, पार्टीको समितिमा संगठित र सक्रिय रहेको, पार्टी र सामाजिक जनकार्यमा समर्पित हुने, स्वच्छ सामाजिक छवि तथा नैतिकवान् भएको हुनु पर्ने छ ।
यस्तै, निर्वाचनमा विजय हासिल गर्न सक्ने सम्भावना भएको, सम्बन्धित क्षेत्र तथा जिल्लाको वस्तुस्थिति बुझेको र सुशासनको प्रत्याभूत गर्न सक्ने योग्यता तोकिएको छ ।
यसैगरी, उम्मेदवार छनोटको प्रक्रिया समेत प्रस्ताव गरिएको छ । उम्मेदवार छनोटका लागि सम्बन्धित प्रदेश तथा प्रतिनिधि सभा निर्वाचन क्षेत्र समन्वय समितिले आवश्यक छलफल गरी योग्य उम्मेदवारहरूका नामावली आ–आफ्नो जिल्ला समन्वय समितिलाई यही भदौ ११ गतेभित्र सिफारिस गर्नुपर्नेछ ।
प्रदेश तथा प्रतिनिधि सभा निर्वाचन क्षेत्र समन्वय समितिबाट सिफारिस भई आएका नामावलीमध्ये छलफल गरी जिल्ला समन्वय समितिले ५ जनासम्म उम्मेदवारहरूको नामावली माथिल्लो (प्रदेश) समितिलाई भदौ १६ गतेभित्र सिफारिस गर्नुपर्नेछ ।
प्रदेश समितिले जिल्ला समन्वय समितिबाट सिफारिस भई आएको नामावलीउपर छलफल गरी ३ जना प्रस्तावित उम्मेदवारको नाम संसदीय बोर्डमा भदौ २० गतेभित्र सिफारिस गरी पठाउन भनिएको छ । संसदीय बोर्डले प्रस्तावित भइआएका उम्मेदवारहरूको सम्बन्धमा आवश्यक छानबिन गरी भदौ २५ गतेभित्र केन्द्रीय कार्यकारिणी समितिमा पठाउने प्रस्ताव छ ।
उम्मेदवारहरूको नामावली सिफारिस गर्दा महिला उम्मेदवारहरूलाई समावेश हुने गरी समावेशितालाई समेत ध्यान पु¥याउने भनिएको छ ।
मङ्सिर ४ गते घोषित प्रदेश तथा सङ्घीय निर्वाचनमा पार्टीको आगामी रणनीति, उम्मेदवार चयन प्रक्रिया, उम्मेदवारको मापदण्डलगायत विषयको तयारीस्वरुप जनता समाजवादी पार्टी (जसपा) नेपाल छलफल गरेको छ ।
जसपाको राजधानीमा भएको राजनीतिक समितिको बैठकमा आगामी निर्वाचनको तयारी, उम्मेदवार चयनको प्रक्रिया, मापदण्ड तथा पार्टीको विभिन्न सङ्गठन संरचना विस्तारलगायत विषयमा छलफल भइरहेको जसपाका राजनीतिक समिति सदस्य डा सुरेन्द्रकुमार यादवले जानकारी दिए ।
नेता यादवले भने, “नजिकिएको चुनावका लागि पार्टीले तय गरेको कार्यक्रम, टिकटको सिफारिस कुन मितिमा कहाँबाट गर्ने हो कहिलेसम्म वितरण गर्ने, उम्मेदवारको मापदण्ड आदि विषयमा छलफल भएको छ ।
बैठकमा पार्टीका अध्यक्ष उपेन्द्र यादवले प्रस्तुत गरेको राजनीतिक तथा साङ्गठनिक प्रस्तावमाथि छलफल गरिएको छ । निर्वाचनमा उम्मेदवारको मापदण्ड, चयन गर्ने प्रक्रिया, विभिन्न विभाग गठन, प्रदेश तथा विभिन्न राष्ट्रिय समितिको इन्चार्ज, सहइन्चार्ज चयन लगायतका प्रस्तावमाथि नेताहरुले धारणा राखेका थिए ।
बैठकमा लोकतान्त्रिक समाजवादी पार्टी (लोसपा) र जसपाबीच गठबन्धनको सम्भावना, पाँच दलीय गठबन्धनमा निर्वाचनमा जसपाको सम्भावित अवस्थाबारे पनि नेताहरुले धारणा राखेको जसपाले जनाएको छ । बैठकले विभिन्न समितिहरुको जिम्मेवारी समेत तोकेको छ । बैठकले मधेश प्रदेशको इन्चार्जमा कृषि मन्त्री मृगेन्द्र कुमार सिंह यादवलाई तोकेको छ । संगठन विभागको प्रमुखमा रामसहाय यादव, आर्थिक विभागको प्रमुख विजय यादवलाई तोकेको छ ।
